Miren Azkarate, Kultura sailburuak Europako Batasunaren Kultura, Hezkuntza eta Gazteriako Ministro Kontseiluaren ikus-entzunezko eta kultura gaietarako osoko bilkuretan parte hartu du euskaraz.  Alde batetik ikus-entzunezko arloari buruzko bileran, non aurkeztu duen merkatu bakarrean sormenezko sareko edukien inguruan ekarpena Europar Batasuneko Kontseiluak Europako Ekonomia eta Gizarte Komitearen Batzordea eta Eskualdeetako Komitearen aurrean aurkeztutako txostenari; ondoren, Kultura sailburuak kultura arloko Kontseiluaren bileran parte hartu du.

Euskadik, Eusko Jaurlaritzaren Kultura sailaren eta Hezkuntza, Unibertsitate eta Ikerketa sailaren bitartez,  Europar Batasuneko Hezkuntza, Gazteria eta Kultura arloko Ministro Kontseiluan kultura eta hezkuntza eta ikus-entzunezko gaietan Erkidegoen ahotsa darama 2008. urteko lehen seihilekoan, Esloveniaren presidentzi aroan.

Ikus-entzunezko gaien inguruko Ministro Kontseiluan, Kultura sailburuak merkatu bakarreko lineako eduki sortzaileak lantzea eta zabaltzea helburu duten ekimenen aldeko jarrera azaldu du. Azkarateren hitzetan,  "lineako eduki sortzaileen inguruko edozein planteamendu egiterakoan, Batzordeak argi eta garbi agertarazi behar ditu sormena eta dibertsitatea (kultura, hizkuntza eta lurralde dibertsitatea, alegia), eta Europako Batasunaren kultura eta hizkuntza aberastasuna arretaz zaindu beharko luke" Are gehiago, kontuan izanda lineako edukiak izango duten garapena, lineako eduki sortzaileen merkatua gora doa etengabe eta berritasunak gero eta azkarrago agertzen dira. Alde horretatik, Azkarateren hitzetan "oreka bat bilatu beharra dago jarrera ezberdinen artean; alegia, alde batetik kontsumitzaile eta erabiltzaileen eskubideak, eta bestetik, jabe eta kudeatzaileen interesak uztartu behar ditugu harremanbide orekatsu batean. Eta horrek guztiak Europa mailako erantzun aktiboak eskatzen ditu. Eduki sortzaileen zerbitzuak lineako inguruneetara transferitzeak zera bilatu beharko luke, eduki europarrek bete-betean bultza dezatela lehiakortasuna -lurraldeen arteko mugen gainetik-, eta edukien beraien zabalkundea eta zirkulazioa, bai eta Europako kultura eta hizkuntza ondarearena ere".

Euskadiren parte hartzea Europako erabakietan, eta oro har Erkidegoena, oso mugatua da eta alde horretatik,  Miren Azkaratek Ministro Kontseiluen atariko unea aprobetxatu nahi izan du  "Euskadiren parte hartzea Europako Batasunaren erakundeen erabaki unetan ez dagola bermatua" gogora ekartzeko. "Parte hartze hori ezinbestekotzat dugu eta Estatua Europako Batasunean txertatu zenez gero defendatzen dugu, are eta gehiago hori etorkizunari begira duen estrategikotasuna kontuan izanda. Europa gure gurea den esparrua da eta hor hartzen diren erabakietan egon beharra dugu herri eta gizarte gisa. Jakin badakigu horretarako muga Madrilen dugula eta ez dugu amore emango hori gainditu arte eta Europan gure lekua egin arte".  

Parte-hartzea mugatua eta itxia da eta hamar gai-arloren inguruan gauzatzen da, parte-hartzeari irekitako lau alderdi hauekin bat etorriz: Nekazaritza eta Arrantza; Ingurumena, Lana, Gizarte Politika, Osasuna eta Kontsumoa; eta Hezkuntza, Gazteria eta Kultura.

Miren Azkarate, Kultura sailburuak, bere presentzia Bruselan aprobetxatuz, Rhodri Glyn Thomas, Galeseko Kultura sailburuarekin Euskadiko Ordezkaritzan bilera egin du, Europa mailan hizkuntza gutxituen erabilerari buruz eta nazioetako gobernuek jorratu beharreko papera mintzagai izan dutelarik.

Eusko Jaurlaritzak gaur eta bihar  agenda zabala burutuko du Bruselan, batetik, Juan José Ibarretxe Lehendakariaren presentzia hainbat erakunde bileretan eta bestetik, Tontxu Campos, Hezkuntza, Unibertsitate eta Ikerketa sailburuak, Miren Azkarate, Kultura sailburuak bezala,  parte hartuko du bihar Europar Batasuneko Ministro Kontseiluan.

Lehendakariak, zehazki, gaur arratsaldean, Luc Van de Brande, Eskualdeetako Lantaldearen Presidentearekin elkarrizketa  izango du Europar Batasunean erkidegoak eta eskualdeak sendotzeari buruz.
Gerora, Lehendakaria, Tontxu Campos sailburua eta Azkarate sailburua hirurak, Europar Batasunak dekretatutako kultura arteko Elkarrizketaren Europako Urtea dela-eta eta Unescok izendatutako kultura aniztasunaren egunean, Eusko Jaurlaritzak antolatutako Flagey Kultura Zentroan Euskadi Goi Mailako Musika-Musikeneko ganbera-orkestrak eskainiko duen ekitaldira joango dira.

Brusela, 2008ko maiatzaren 21ean